Fagorganisering ved Arne Fabrikker

Då arbeiderforeininga melde seg inn i Norsk Arbeidsmandsforbund i 1908, var Bastian Haugland leiar. Han blir derfor rekna som den første fagforeiningsleiaren ved Arne Fabrikker. Han er heidra med ein bauta i sentrum av Ytre Arna, avduka i 2002.

Samme hausten vart Bastian Haugland oppsagt frå fabrikken. Fagforeininga såg dette som ei trakassering og ei klar politisk oppseiing. Dei vende seg til Arbeidsmandsforbundet og ba om støtte til å gå til streik for å få Haugland tatt inn igjen. Men forbundet turde ikkje ta ein konflikt på dette.

Bastian Haugland vart derfor for alltid utestengt frå Arne Fabrikker, men han og familien vart buande på staden. Han livnærte seg seinare som slaktar og kjøpmann.