Bustadhusa til Peter- og Johan Jebsen
Peter Jebsen flytta inn i det nye huset sitt som blei oppført kring 1855/56. Her budde han til 1864 då han, kona Anna og seks born flytta til Bergen. Huset fekk tilnamnet «konsulhuset» etter Peter si rolle som konsul. Mange år seinare, kring 1890 flytta ein tilsett ved fabrikkens kontor i Bergen til Ytre Arna. Hans navn var Oluf Jensen. Han og familien budde i dette huset i mange år. Barnebarnet hans, Bjørn malte «konsulhuset» mens han var svært ung. Maleriet kan du sjå i museet. Huset blei rive i 1940, det stod i vegen for ny spinneribygning.
Johan bygde seg òg hus på denne tida, bilde til høgre. Her budde han til også han og familien flytta til Bergen, i 1884. Lækjar Wollert Henrik Krohn som var gift med dotter til Johan budde i huset til han døydde i 1913. Gudrun Kolderup som blei den nye lækjaren kom til Ytre Arna som assistentlækjar, og folketeljinga frå år 1900 viser at også ho budde i huset. Ein kan framleis sjå huset i dag, litt sør for den gamle spinneribygningen.